| Sterkare nedgang i aktive bruk i Hordaland og Sogn og Fjordane enn i landet totalt
Det siste tiåret er talet aktive bruk redusert med 39 prosent i Hordaland og 35 prosent i Sogn og Fjordane, medan reduksjonen på landsbasis var 31 prosent i same perioden. Medan det totale jordbruksarealet har vore om lag uendra på landsbasis, er arealet redusert med 10 prosent i Hordaland og 3 prosent i Sogn og Fjordane. Fulldyrka areal er redusert med 4 prosent på landsbasis, medan det i Hordaland er redusert med 21 prosent. I Sogn og Fjordane har ikkje nedgangen i fulldyrka areal vore like stor som i Hordaland, men også i dette fylket har nedgangen vore større enn landsgjennomsnittet. Stor auke i innmarksbeite gjer at jordbruksareal i alt viser mindre nedgang enn fulldyrka areal i dei to fylka.
Strukturendringa for dei viktigaste produksjonane, mjølkeproduksjon og sauehald, har ikkje gått like fort på Vestlandet som i resten av landet. I Hordaland er gjennomsnittleg storleik på bruk med mjølkeproduksjon auka med 41 prosent i perioden, til 15,1 kyr. I Sogn og Fjordane auka kutalet med 43 prosent i perioden, til 14 kyr i gjennomsnitt, medan landsgjennomsnittet auka med 50 prosent til 19,8 kyr per bruk. Levert mjølkemengde er redusert med 15 prosent i dei to fylka (tala for Hordaland gjeld Hordaland utanom Ølen) frå 1999-2008. På landsbasis var nedgangen 7 prosent i same perioden.
For sauehaldet auka dyretalet per bruk med 32 prosent i Hordaland og 31 prosent i Sogn og Fjordane, medan landsgjennomsnittet auka med 43 prosent. I 2008 var gjennomsnittsbuskapen av sau høvesvis 49,8 vinterfôra sauer i Hordaland, 55,2 i Sogn og Fjordane og 69,9 i gjennomsnitt for landet.
Bruka på Vestlandet har hatt om lag same trenden i økonomisk utvikling som resten av landet det siste tiåret, men nivået har lege mellom 20 000 og 25 000 kroner per årsverk under landsgjennomsnittet.
Resultata kjem fram i ein analyse av verdiskapinga i landbruket i Hordaland og Sogn og Fjordane, publisert i notatet Verdiskaping i jordbruk, skogbruk og tilleggsnæringar i Hordaland og Sogn og Fjordane.
For mer detaljerte opplysninger, kontakt Heidi Knutsen eller Torbjørn Haukås.
Se også oversikt over andre forsidesaker.
Publisert 06.11.2009 | 
