Pressemelding 03.12.2008

Jærbøndene best i 2007

Inntektsnivået i jordbruket var høgast på Jæren i 2007. Jærbøndene auka jordbruksinntektene med 35 % til kr 291 900 frå 2006 til 2007. Også i resten av Rogaland og Agder auka jordbruksinntektene i same periode, med 30 % til kr 201 000. Det viser den årlege rekneskapsundersøkinga frå Norsk institutt for landbruksøkonomisk forskning (NILF).

Jordbruksinntektene, målt som vederlag til arbeid og eigenkapital per årsverk, auka med 35 % på Jæren og med 30 % for andre bygder i Rogaland og Agder. Produksjonsauke og auke i mjølke- og kjøtprisen gjorde at bøndene i Rogaland og Agder-fylka fekk eit godt inntektsår i 2007, sjølv om rentene auka frå 2006.

Jordbruksinntektene auka for dei vanlege produksjonane i begge regionane. Størst var auken for bruka med kombinert mjølkeproduksjon og svinehald på Jæren, med 53 %. Desse bruka oppnådde ei jordbruksinntekt på kr 344 800 per årsverk i 2007. For mjølkeproduksjonsbruka på Jæren auka jordbruksinntektene per årsverk med 19 %, til 218 400.

I dei andre bygdene i Rogaland og Agder, oppnådde mjølkeproduksjonsbruka ei jordbruksinntekt på kr 182 900. Det er ein auke på 24 % frå 2006. I denne regionen var det bruka med kombinert mjølkeproduksjon og sauehald som hadde høgast jordbruksinntekt i 2007, med kr 214 400 per årsverk. På desse bruka vart mjølkeproduksjonen noko redusert, og sjølv om produksjonen auka i sauehaldet, vart auken i jordbruksinntekta lav for denne gruppa, 4 % frå 2006 til 2007.

Investeringsnivået i dei to regionane var høgast i landet i 2007. I gjennomsnitt var nettoinvesteringa per bruk kr 107 800 på Jæren og kr 131 600 i dei andre bygdene i Rogaland og Agder. Samla gjeld auka med høvesvis 8 % og 20 % i dei to regionane. Høgast gjeld hadde bøndene på Jæren med kr 2,79 mill.

Skattefordelen fom følgje av jordbruksfrådrag er ikkje med i resultatmåla. Skattekorrigert inntektsauke var 38 % for Jæren og 34 % for dei andre bygdene i Rogaland og Agder.

I alt omfattar granskinga 902 bruk frå heile landet, 49 bruk er frå Jæren og 82 bruk frå resten av Rogaland og Agder-fylka.

Jordbruksinntekt per årsverk à 1845 timar i perioden 1975-2007

For ytterlegare opplysningar, kontakt: Heidi Knutsen

Det finnes også ein lang versjon av denne pressemeldinga.

I tillegg til opplysningane i denne pressemeldinga, har NILF på Internett også mykje anna informasjon om driftsgranskingane 2007.