Pressemelding 09.11.2004 fra NILFs distriktskontor i Bergen

Inntektene til bøndene på Sør- og Vestlandet ned med 9 %

Jordbruksinntektene i sør- og vestlandsfylka var i gjennomsnitt kr 143 400 per årsverk i 2003. Det er ein nedgang på kr 13 600 frå 2002 til 2003. Dette viser den årlege rekneskaps­undersøkinga frå Norsk institutt for landbruksøkonomisk forskning (NILF).

Jordbruksinntektene, målt som vederlag til arbeid og eigenkapital per årsverk, varierer mellom fylka. Resultatet er best i Rogaland og Møre og Romsdal, medan det er størst nedgang i Hordaland og Vest-Agder. Ulike produksjonar, ulikt produksjonsomfang, ulik storleik på bruk og ulik grad av investeringar er hovudårsakene til skilnadene mellom fylka. Inntektsverknad av auka jordbruksfrådrag er ikkje med i resultatet.

Produktprisar og volum viser ein liten auke for dei fleste produksjonar, men reduksjon i samla tilskot og kostnadsauke førte til at jordbruksinntektene gjekk ned. Avlingsnedgang er hovudårsaka til at fruktprodusentane fekk størst nedgang i inntekta samanlikna med året før (-13 %). For mjølkeprodusentane førte nedgang i mjølkepris og auka kostnader til ein reduksjon i jordbruksinntektene på 6 %. Lågast lønsemd er det framleis i sauehaldet.

Den samla inntekta til bondefamilien gjekk ned med 2 % til kr 432 400 frå 2002 til 2003. Nedgangen skuldast hovudsakleg redusert bidrag frå jordbruket. Auke i lønsinntekter og auka bidrag frå anna næringsverksemd gjer at reduksjonen av samla inntekt er mindre enn reduksjonen i jordbruksinntektene. Inntekter utanom bruket stod for 57 % av familiens samla inntekter i 2003 mot 52 % i 2002.

For ytterlegare opplysningar, kontakt:
Heidi Knutsen ved NILFs distriktskontor for Vestlandet

I tillegg til opplysningane i denne pressemeldinga, har NILF på Internett også mykje anna informasjon om driftsgranskingane 2003.