Sauebøndene hadde best utvikling i jordbruksinntekt på Vestlandet i 2008

På Vestlandet var det sauebøndene som hadde størst auke i jordbruksinntekta i 2008. I gjennomsnitt auka jordbruksinntekta med 3 % for vestlandsbonden, medan sauebonden fekk auka si jordbruksinntekt med 48 %. Det viser den årlege rekneskapsundersøkinga frå NILF.

Jordbruksinntektene, målt som vederlag til arbeid og eigenkapital per årsverk, auka i gjennomsnitt for vestlandsbonden med 3 %, til kr 187 900 frå 2007 til 2008.

Bruka med sauehald oppnådde den største auken i jordbruksinntekt frå 2007 til 2008, med kr 46 600 (48 %), til kr 144 400 per årsverk. Sauehald ligg likevel lågare enn dei andre produksjonane i jordbruksinntekt. Auke i produksjonsinntektene, auka effektivitet og uendra rentekostnader er viktige årsaker til den gode utviklinga. Også bruka med frukt hadde eit godt år i 2008, med ei auke i jordbruksinntekt per årsverk på 23 %, til kr 215 500.

Høgast jordbruksinntekt oppnådde bruka med kombinasjonen mjølkeproduksjon og svinehald, med kr 250 600, ein auke på 9 % frå 2007. Produksjonsauke, auka prisar på kjøt og mjølk og nedgang i arbeidsforbruket førde til auka jordbruksinntekt på desse buka, trass i auka kostnader.

Mjølkeproduksjon har gjennom mange år vore basisen for landbruket på Vestlandet. Også desse bruka hadde auke i produksjonsinntektene i 2008, men kostnadsvekst både på driftsmiddel og renter førde til nedgang i jordbruksinntekta med 7 % frå 2007 til 2008, til kr 182 600.

Investeringsnivået var høgt også i 2008. I gjennomsnitt var nettoinvesteringa per bruk kr 76 800. Samla gjeld per bruk auka med 14 % til kr 1,36 mill.

Skattefordel som følgje av jordbruksfrådrag, er ikkje med i resultatmåla. Skattekorrigert inntektsauke var 4 % i gjennomsnitt for vestlandsbonden..

I alt omfattar granskinga 861 bruk frå heile landet, 164 bruk er frå vestlandsfylka Hordaland, Sogn og Fjordane og Møre og Romsdal.

Det finnes også en lang versjon av dette oppslaget.

I tillegg til opplysningene i dette oppslaget, har NILF på Internett også mye annen informasjon om driftsgranskingene 2008.

For meir detaljerte opplysninger, kontakt Heidi Knutsen.

Se også oversikt over andre forsidesaker.

Publisert 15.12.2009